Header Ads

Seo Services

تحذير هام قبل استخدام خدمات نيابة المرور + تكلفة اصدار رخصة 3 سنوات

تحذير هام قبل استخدام خدمات نيابة المرور
+ تكاليف اصدار رخصة ملاكي 3 سنوات



السلام عليكم و رحمة الله و بركاته
النهارده هحكيلكم تجربتي مع خدمات نيابة المرور و المشكله اللي حصلت معايا


اول حاجه انا روحت نيابة المرور يوم 2019/06/29 علشان اعمل شهادة مخالفات قالي ادفع 10 جنية رسوم خدمة مميكنه و طلع عليا مخالفات زي ما 520 جنيه زي ما كنت مستعلم عنها في الموقع 




قالولي عاوز تعمل تظلم ادفع 10 جنية رسوم خدمة مميكنة 

دفعت و بعد ربع ساعه جابولي نفس الورقة بـ 520 جنية ,, طيب عاوز ادفع ,, قالولي ادفع فيزا في الدور اللي فوق 



طلعت للموظف علشان اسدد قالي انت جاي تسدد ايه لسا التظلم قيد التنفيذ ,, طيب هيخلص امتي قالي غالبا بكرة 




روحت البيت و فتحت موقع خدمات نيابة المرور لقيت فعلا ان لسا التظلم قيد التنفيذ

فتحت تاني بعد المغرب لقيت التظلم خلص و المبلغ زي ما هوا 



قولت خلاص بقي اسدد من علي النت بدل ما اروح نيابة المرور تاني بكرة 

و اخترت عملية السداد عن طريق الفيزا و الاستلام عن طريق البريد مقابل رسوم 20 جنيه مصاريف نيابة مرور و 15 جنية رسوم بريد و 5 جنية رسوم تحصيل اليكتروني من شركة E-Finance و بقي المبلغ 566 جنية و التوصيل خلال مدة اقصاها 3 ايام .
في هنا ملحوظه صغيرة بقي انك ممكن تدفع عند الاستلام لو مفيش فيزا و ده كان الاختيار الانسب لان كده انا مش خسران حاجه بس انا للاسف سددت عن طريق الفيزا علشان كده بكتب الموضوع ده هنا علشان الناس تتعلم من خطأي .



المهم استنيت لحد يوم 2019/07/09 و رخصتي انتهت يوم 2019/07/08 و مفيش حاجه وصلت بعد ما عدي 10 ايام 

روحت لمكتب البريد سألت اذاي شهادة المخالفات لسا موصلتش لحد دلوقتي ,, دورا عندهم و قالولي مفيش حاجه وصلت من نيابة المرور لحد دلوقتي ..
طيب ايه الحل ,, قالوا تدفع 30 جنيه و تستلم واحده تانيه نعملهالك دلوقتي طالما المخالفات اتشالت 



قولت تمام دفعت و استنيت استلم الشهاده ,, الموظف قالي للاسف مش هينفع اطلعلك شهادة جديدة لحين انتهاء الطلب القديم ,, طيب انا رخصتي انتهت ,, الموظف قالي للاسف معنديش حل 

قولت اروح علي المرور اخلص اجراءات التجديد و الفحص و ابقي استفدت اي حاجه النهارده 



روحت اشتريت الملف و ورق الطفاية و استلمت شوية الحاجات الغريبه دي ( مثلث و قرطاس و شنطة اسعافات و كتيب تعليمات المرورو و شوية حاجات محدش بيسمع عنها في طبق اليوم ) المهم دخلت علي الفحص الساعه 10.08 صباحا ,, قالولي الفحص خلص ,,, يعني ايه يا جماعه الساعه لسا 10 الصبح قالولي تعالي بكره بدري ,, ده مرور دمنهور البحيرة - ايه رايكم في الناس اللي بتخلص شغل الساعه 10 الصبح دي 




المهم اخدت بعضي من سكات و قولت اروح اشوف حالي في مكان تاني 

اروح نيابة المرور اشوف حل لمشكلتي 
روحت دخلت علطول علي موظف السداد قولتله انا مسدد فيزا من يوم 2019/06/29 و لسا لحد النهارده مفيش حاجه وصلتني 
استعلم عنده و قالي بالفعل المخالفات متسددة و مفيش عليك اي مخالفات انزل ادفع بس 10 جنية رسوم خدمة مميكنة علشان اعرف اطبعلك شهادة مخالفات 
نزلت دفعت و جبتله الايصال ,, و كانت اللحظة الفارقة ,, الموظف جه يطبعلي شهادة المخالفات ,, ظهرله رسالة ان لا يمكن طباعة شهادة مخالفات اخري لحين الانتهاء من الطلب الجاري .



و فضلت انا و الموظف نبص لبعض ,, طيب ايه الحل ,, قالي مش عارف ,, الموضوع متعلق من الادارة في القاهرة 

طيب اتصل بيهم ,, قالي معرفش اتواصل معاهم ,, طيب مين يعرف ,, قالي مش عارف 
فجأة قالي انت ممكن تلغي الطلب اللي انت عامله من علي النت ,, قولتله ايوه ممكن ,, قالي خلاص الغيه و انا اطبعلك من هنا و تبقي المشكله اتحلت 
و بالفعل نفذت المحاولة و عملت الغاء من الموقع و سألني علي سبب الالغاء ,, قولت عدم وصول الطلب حتي تاريخة 
و تم الغاء الطلب و اصبح حالة الطلب : طلب ملغي 



و هنا بقي جرب الموظف يطبعلي شهادة المخالفات و كانت المفجأة ,,,,,,,,,,,, المخالفات نزلت عليا من تاني 520 جنية بعد ما تم خصمها من الفيزا بتاريخ 2019/06/29

طيب ايه الحل !!!!!!!



الموظف قالي بص انت علشان تخلص نفسك ادفع هنا دلوقتي و الفلوس دي كده كده هتتردلك في الفيزا 

قولتله تمام سددت بالفيزا و انا واقف عند الموظف و بالفعل استلمت شهادة المخالفات اللي هيا مبلغها 550 بعد اضافة رسوم نيابة 20 جنية و رسوم تحصيل شركة E-Finance بتاعت السداد الاليكتروني 5 جنية و ضريبه و الذي منه 
بقيت مسدد كام كده لحد دلوقتي 550+566 = 1116 جنية 



اظن العرض هايل ادفع اونلاين و احصل علي ضعف المخالفات هدية 

المهم اخدت شهادة المخالفات و استنيت ساعه و اتصلت بالبنك و سألته علي اني مسدد مرتين مرة بتاريخ 2019/06/29  و مرة تانيه بتاريخ 2019/07/09 ,,, قالي بالفعل متسدد مرتين لصالح نيابة المرور ,, سألتة في فلوس اتردت في الحساب تاني قالي لاء يا افندم مفيش حاجه زي كده حصلت 
او طبعا لحد النهارده بردو مفيش اي حاجه حصلت ولا الفلوس رجعت 




المهم الغرض من المقالة دي ايه ( زي ما قولت في عنوان المقالة . ده تحذير لكل حد عاوز يستخدم خدمات نيابة المرور - قبل ما تضيع فلوسك و تحط نفسك في الحيرة دي ) لما تيجي تختار طريقة الدفع اختار الدفع عند الاستلام و ادفع الفلوس لمندوب البريد بعد ما تحصل علي الخدمة 

اظن كده الرسالة واضحة 




نيجي بقي للشق التناني في الموضوع 



هدفع كام و انا بجدد ترخيص 3 سنين 

انا عربيتي موديل 2001 موتور 1600 سي سي
انا كنت ناقل ملكية  و كان مصراريف نقل الملكية 360 جنية + 13 جنية ميكروفيلم + تصوير الورق بقي و الذي منه 
نيجي بقي للمرور  بشتري ملف نقل ملكية شامل الاتي 


اولا الملف اللي فيه شوية ورق 




مثلث عاكس



شنطة اسعافات 



كتيب دليل المرور



لزقة حمراء كده بتتلزق علي العربية المفروض انها شبه العاكس كده 



بتاع كده لونه فسفوري زي اللي بيلبسوه عساكر المرور اللي واقفين في الاشارة علشان لو عطلان في طريق مظلم تلبسه و العربيات تشوفك 



و قرطاس زي بتوع المرور بس بيتقفل و يتفتح 




دول بكام بقي ( بـ 380 جنية ) 
البند اللي بعده بقي طفايتين حريق ثمنهم 610 جنية 
دول بقي بتستلمهم بعد الفحص
و الفحص عبارة عن معاينه سريعه للعربية يتأكد ان مفيش فيها خبطات ولا فاميه ولا ملصقات و بعد كده بياخد رقم الموتور و رقم الشاسيه يطابقهم و تروح تستلم الطفايتين 

و بعد كده بتروح تكمل اجراءات الرخصة لحد ما توصل لمرحلة الدفع 

ضريبة سنوية : 90 جنية 
رسم استعمال راديو 4.20 جنية 
رسم استعمال لوحات معدنية : 1.20 جنية 
رسم اصدار رخصة كمبيوتر 20 جنية 
رسم تنمية موارد الدولة : 1125 جنية 
ايصال تنمية 0.10 جنية 
دمغة نوعية 18 جنية 
قسط تأمين 320 جنية 
رسم التأمين الصحي الشامل 450 جنية 
رسم طابع الشهيد 5 جنية 

و بكده يبقي الاجمالي 2033.5 جنية 




الا اذا كنت بتنقل من محافظة لمحافظة تانية هدفع مبلغ ثمن لوحات هيبقي في حدود 200 جنية 

و بكده يبقي مبروك عليك الرخصة 

و ده فيديو عن الموضوع 






ليست هناك تعليقات